31.12.2011 13:18:58 / eydisein
Jæja seinasti dagur ársins 2011 og ég sit í tölvunni með tebolla og hef það notalegt. Það hefur kyngt niður snjó hérna á suðvesturhorni landsins í allan desember og virkilega fallegt út að líta.
Þar sem árið er að renna sitt skeið finnst mér tilvalið að líta yfir farinn veg og rifja upp árið í hnotskurn:
Janúar og febrúar fóru mest í vinnu og að koma sér betur fyrir í íbúðinni svona eins og konum einum er lagið.
Mars var mánuður veikindanna þar sem ég lá í viku í kvefi - ojbarasta!
Apríl kom með páskafrí og afmæli og fast á hæla hans kom maí en um mánaðarmótin fór ég heim í sveitina í sauðburð og dvaldi þar í viku við ljósmóðurstörf og aðra tilfallandi sveitavinnu. Maí var einkar hressandi enda flæddi adrenalínið um æðar mér og hefði ég vel getað hugsað mér fleiri tíma í sólarhringnum!
Júní var kaldur og ekki mikið verið að spóka sig í tjaldi né í fjallgöngum. Við skötuhjúin skruppum þó óvænt til Hafnar í byrjun júní og kíktum á menn og málleysingja - gaman það.
Júlí og ágúst voru sumarfrísmánuðirnir okkar, þrátt fyrir að ekki hafi fríið verið samfellt. Ég byrjaði sumarfríið heima í heiðardalnum þar sem ég og mamma sigruðum náttúruöflin og létum ferja okkur yfir Múlakvísl á gamla mátann meðan að bygging nýrrar brúar stóð sem hæst. Örn kom svo og saman fórum við hringinn og skoðuðum marga áhugaverða staði og hittum vini og kunningja. Í ágústmánuði kíktum við svo útfyrir landsteinana til fyrirheitnalandsins - Danmörk. Dvöldum í tvær vikur hjá ættingjum og vinum, spókuðum okkur í góðu veðri í landi frænda vorra og nutum lífsins í botn.
Alveg yndislegt sumarfrí sem lengi verður í minnum haft.
Efst á dagskrá í september var svo brúðkaup systur minnar sem fór vel fram og einkar ánægjulegt fyrir undirritaða að ná að klára brúðarkjólinn á tilsettum tíma! Fjúff!
Október og nóvember voru frekar hlýir miðað við það sem gengur og gerist en réttir og göngur voru þó á dagskránni þessa haustmánuði sem og handavinna og almenn notalegheit.
Desember leið hratt enda brjálað að gera í vinnunni en aðventan var samt afar ánægjuleg og leið að öðru leiti við föndur, jólagjafakaup, bakstur og hlýlegar hugsanir til vina og vandamanna. Jólin komu og fóru en mikið var borðað af góðum mat 
Kærar kveðjur úr snjónum og takk fyrir liðið ár
Eydís
»
19.11.2011 00:03:04 / eydisein
Skammdegið er farið að gera vart við sig enda bara mánuður í stysta dag ársins. Annars er óvanalega heitt þessa dagana miðað við árstíð. Fé vill ekki af fjalli og við situm inni á verkstæði á stuttermabol og klórum okkur í höfðinu yfir öfugmælinu.
Það er búið að vera afskaplega notalegt í október- og nóvembermánuði hérna hjá okkur. Ég hlakka barasta orðið til desembermánaðar, sérstaklega ef það myndi nú snjóa aðeins og gera aðventuna ennþá meira kósí!
Hérna á Langholtsveginum er ýmislegt í bígerð, jólagardínur, lopapeysa, jólagjafir sem og nokkur smáverkefni fyrir hina og þessa. Er með kollinn fullan af hugmyndum en minna af tíma þessa dagana...
Einstaklega skemmtileg vinnuvika að baki - ekki slæmt 
Bið að heilsa í bili
Eydís
»
17.10.2011 20:13:47 / eydisein
Það er nauðsynlegt að hafa einhvern til að tala við. Um allt milli himins og jarðar. Einhvern sem hlustar og kemur með tillögur en virðir jafnframt skoðanir manns. Lætur manni líða eins og maður hafi eitthvað til málanna að leggja þrátt fyrir að vera ekki alltaf sammála manni. Að sjálfsögðu er þetta gagnkvæmt. Maður verður sjálfur að kunna að hlusta.
Sem betur fer hef ég nokkra svona í mínu lífi. Aðila sem ég get talað við um öll heimsins mál, neikvæð sem og jákvæð. Það er virkilega mikils virði. Og þó maður sé langt í burtu frá fólki er samt hægt að vera nálægt því 
Nóg komið af væmni að sinni
Bið að heilsa ykkur fallega fólk
»
26.09.2011 20:55:58 / eydisein
September er hafinn með sínum gulu og rauðbrúnu litum og vætusömu veðurfari. Það er líka ýmislegt annað sem september hefur upp á að bjóða sem og skólabyrjun, berjamó, sláturtíð og margt annað sem undirbýr mann fyrir komandi vetur.
Danmerkurferðin var æðisleg í alla staði. Fórum frá Køben til Odense til Århus til Aalborg og aftur til baka sömu leið. Hittum alla vini og ættingja sem áætlað var að hitta, fengum ógrynni af góðum mat, kíktum í búðir og á markaði, keyrðum um Jótland og höfðum það notalegt í mjög góðu veðri. Við leigðum okkur bílaleigubíl og gátum því farið hvert sem við vildum, hvenær sem við vildum, eitthvað sem við gátum sjaldan þegar við bjuggum úti. Virkilega vel heppnað sumarfrí - ég er hæstánæð
Vinnan er farin að rúlla og allt gengur sinn vanagang. Fór í giftingu í byrjun september, fámenn en góðmenn og veislan haldin í heimahúsi. Mjög gaman og góður matur. Svo er maður aðeins farin að grípa í handavinnuna aftur eftir smá hlé enda hefur kjólasaumur og annar vélsaumur átt hug minn allan síðustu vikur.
Bið að heilsa í bili,
Kv Eydís
»
06.08.2011 14:09:13 / eydisein
Það er búið að fara afskaplega vel um okkur í sumarfríinu. Ég fór jú austur þar sem ég dvaldi í nokkra daga og var einkar heppin með veður. Vann í garðinum með mömmu sem var klárlega hápunktur dvalarinnar þar sem við komum heilmiklu í verk. Húrra fyrir okkur! Kaffidrykkja og andleg afslöppun var þó helst á dagskrá enda hvergi eins gott kaffi og í sveitinni heima.
Örn kom svo svo nokkrum dögum á eftir áætlun þar sem bíllinn var eitthvað að stríða okkur. En hringinn komumst við og gerðum margt skemmtilegt. Við heilsuðum upp á afa og þau og fengum dýrindis heimagert bakkelsi eins og að gömlum og góðum sveitasið. Hittum vini og kunningja, þar sem við m.a. fórum í fjós og enduðum svo í fjörugu fjölskyldupartýi með allri fjölskyldunni. Dásamlegt alveg hreint! Annars létum við bara eins og túristar, fengum okkur ís á hverri bensínstöð, stoppuðum til að taka myndir, elduðum aldrei, sváfum í bílnum, prófuðum sundlaugarnar og sveigðum oft af leið til að skoða áhugaverða staði... og fá okkur kaffi.
Síðastliðin vika leið ekkert alltof hratt. Alltaf erfitt að byrja að vinna eftir frí. En einungis vika í áætlaða Danmerkurför og við erum orðin dálítið spennt.
Svo fer að líða að blessuðu haustinu og öllu sem því fylgir...
þar til næst
kv ferðalingur
»
10.07.2011 11:01:13 / eydisein
Sumarfrí bráðlega, jibby!!! Annars er harla fámennt í vinnunni, þar sem næstum allir eru komnir í sumarfrí. Við verðum þrjú í næstu viku en svo er ég líka komin í frí
Hinsvegar setja þessi náttúruöfl allt á annan endann hjá manni og stefna yfirvofandi hringferð í hættu. Ég er ekkert afskaplega ánægð með flóð og eldgos þegar ég þarf að ferðast, sérstaklega ekki um sumartímann.
Kv EE
»
18.06.2011 16:46:15 / eydisein
Á 17. júní í fyrra gengum við skötuhjú á Esjuna, afskaplega hressandi og fínt veður að mig minnir. Seinni partinn kíktum við svo aðeins niður í bæ og sú ferð endaði á kaffihúsi. Að þessu sinni nenntum við ómögulega niður í mannmergðina svo við tókum rúnt útfyrir bæjarmörkin og enduðum á Þingvöllum, rosalega þjóðleg á sjálfan þjóðhátíðardaginn
Ég er annars að prjóna á mig lopapeysu og get ekki lagt hana frá mér. Langar helst að gera nokkrar... sjáum til með það.
Mumford and sons eru málið þessa dagana. Örn spurði mig hvort ég yrði aldrei leið á þeim. Ég lyfti brúnum og horfði á hann hvumsa og svaraði með einatkvæðis orði: nei.
Youtube er í einu orði sagt snilld.
»
12.06.2011 23:44:47 / eydisein
Júní stendur á dagatalinu... ég nenni samt ekki að tala um veðrið þrátt fyrir löngun mína til að kvarta sáran, eins og allir landsmenn, um vöntun á batnandi tíðarfari. Sumarið er þó komið samkvæmt dagatalinu og okkar nánustu byrjaðir einn af öðrum að tínast út fyrir landsteinana. Við förum ekki strax í sumarfrí en getum þó huggað okkur við það að við eigum okkar utanlandsferð til góða, maður borðar jú beztu molana síðast.
Annars er nóg að gera. Stutt vinnuvika framundan, einungis þrír dagar, sem er ágætt svona inn á milli þó að ég uni mér aldeilis ágætlega í vinnunni. Hef ekki verið nógu dugleg í heimaverkefnunum upp á síðkastið og verð að fara að taka mig á, bara svona fyrir sjálfan mig. Er þó alltaf með puttana í einhverju verkefni hvort sem það er fyrir mig eða aðra.
Útilegur hafa ekki verið planaðar í bráð enda er mögulegt að undirmeðvitundin sé ekki innstillt á slíkar iðkanir í þessari tíð. Ég hef samt trú á að úr rætist og að við getum farið í þess konar ferðalög fyrr en varir...
þar til næst
Eydís
»
28.05.2011 17:16:29 / eydisein
Ég er búin að eignast nýjan vin. Stefán Breki heitir hann og segist vera sex ára en ég veit ekki hvort ég trúi að hann sé svo gamall. Hann heillaði mig uppúr skónum með gulgrænu augun sín þegar hann kom og heilsaði upp á mig þar sem ég sat á dyraþrepinu í morgunsólinni. Hann minnti mig svolítið á kettina í hverfinu sem koma alltaf aftur ef maður sýnir þeim áhuga. Hann sýndi mér kungfu takta sem hann sagði að ég gæti æft mig á inni. Ég hef nú alltaf verið veik fyrir dökkhærðum karlmönnum og hann er þar enginn undantekning.
»
15.05.2011 20:07:48 / eydisein
Kjötsúpan mallar á eldavélinni, lopapeysan liggur til þerris inni á baði, þvottavélin malar og bíllinn er hreinn að innan sem utan. Já helgin var einkar indæl og að mestu tekin í húsmóðursverk, eins og ein í vinnunni kallaði það.
Mér leist svo asskoti vel á að taka allt í gegn, svona einskonar vor-umbreytingar að ég vatt mér bara í herlegheitin strax á föstudaginn. Brunuðum í búð til að kaupa hitt og þetta sem vöntun var á. Ætluðum að hengja upp hillur sem keyptar voru en þær reyndust of djúpar, svo við þurfum að fara og skipta. En þrátt fyrir eilítil vonbrigði varðandi hilluvesenið var ýmislegt annað sem hægt var að gera. Kláraði lopapeysuna yfir Eurovision, dundaði við föndur, tók myndir, þrifum bæði bíl og bú og duddaði í hinu og þessu.
Hefði viljað gera mun meira, líma filmu í rúður, sauma púða, breyta bæði kommóðunni og hillunni, föndra meira, slá garðinn og og og... ef ég bara ætti fleiri tíma í sólarhringnum. Það er komin einhver vorhugur í mig og mig langar að dunda endalaust hérna heima við að breyta og laga. Er eilítið óþolinmóð og vil helst gera allt í einu!
Bið að heilsa, þarf að drífa mig
80´s
»
23.04.2011 16:23:03 / eydisein
Loksins kom hið langþráða páskafrí með afslöppun, letilífi og góðum mat. Afmælið kom og fór og finnst mér ótrúlegt hvað tímanum líður! Orðin gömul en samt ekki. Er svo stutt síðan ég bloggaði um 24 ára afmælið, finnst eins og ég hljóti að hafa misst úr svona allaveganna eitt ár! Sumardagurinn fyrsti drukknaði svolítið í afmælishugleiðingum og sömuleiðis skírdagur. Mér fannst eiginlega mesta svindl að þessir tveir frídagar bæru upp á sama daginn!
Matarboð í gær og annað á morgun. Mestu þægindi að þurfa lítið að elda þegar maður er svona latur. Betri helmingurinn ætlaði að grilla handa afmælisbarninu en það var svo leiðinlegt veður á sjálfan sumardaginn fyrsta að ekkert varð af því. En kjötið var samt eldað og kartöflusalatið etið, svo allir undu glaðir við sitt. Svo nældi maðurinn sér í kvef, svo það sem af er fríi er búið að fara í inniveru og rólegheit.
Páskafríið verður sennilega fljótt að líða en sumarið er þó ekki langt undan með öllu sínu 
Bið að heilsa þar til næst
Kv afmælisbarnið
»
28.03.2011 15:25:53 / eydisein
Búin að vera veik síðan á fimmtudag. Ekkert sérstaklega skemmtilegt. Ekkert að gera og alls engin orka til að gera eitt né neitt þar fyrir utan.
Las reyndar eina bók eftir Bjarna Harðarson (já þennan eina sanna). Hún var asskoti ágæt... skáldsaga úr raunveruleikanum um formæður hans austur á fjörðum. Súrsæt, svona eins og bækur um gamla tíma eru. Um fátækt þar sem mæður þurftu að sjá á eftir börnum sínum til vandalausra og um erfiðisvinnu allan ársins hring, langt fram á elliár.
Fannst reyndar best þegar hann var spurður að því ungur af gömlum manni hvort að hann pabbi hans væri ekki bóndi. "Jú hann er það" svaraði hann. "Með kýr og kindur?" "Nei, með gróðurhús" svaraði hann. Löng þögn "Já og ræktar grænmeti"? "Nei, afskorin blóm" var svarað. "Blóm! Og lifir af því!"
Annars er ég farin að hlakka til sumarsins
Kær kveðja frá lasarus
»
16.03.2011 21:53:41 / eydisein
Það sem við vorum stundum látin gera í skólanum úti var að "brainstorma", bæði til að fá hugmyndir og vinna úr þeim. Það gerðum við t.d. með því að skrifa stikkorð niður á blað, allt sem manni datt í hug í sambandi við einhverja ákveðna hugmynd. Svo valdi maður úr, grisjaði, og smám saman kom skýrari mynd af hugmyndinni.
Annað sem ég hef gert er að skrifa. Skrifa samfelldan texta, það sem kemur fyrst upp í hugann, leyfa fingrunum að taka völdin og bara að skrifa. Það reyndar virkar ekki alltaf en oftast þá koma heilu ritgerðirnar út og ég geri hlutina áreynslulaust. Víst getur svo verið að maður þurfi að lagfæra og grisja úr en oftast er textinn þokkalega nýtilegur þrátt fyrir að hafa verið skrifaður í belg og biðu.
Ég hef líka vanið mig á að skrifa punkta. Samhengislausar setningar sem samt sem áður eiga það sameiginlegt að vera það sem er efst í huga mér það sinnið. Ætla að enda þetta blogg á punktabloggi, sem ég hef jú gert nokkrum sinnum áður, og sem hefur ekki mikinn tilgang nema að lýsa því sem ég er að hugsa:
- Fékk lítið páskaegg á dag
- Er löt
- Horfði á góða mynd áðan
- Vantar uppskrift að fallegri prjónapeysu
- Langar til útlanda í sumar
- Finnst gaman í snjó
- Þarf að fara í klippingu
Kveð ykkur að sinni
Kv Eydís
»
20.02.2011 18:40:28 / eydisein
Tíminn flýgur áfram og ég er alveg sammála Gunnu systur, aldrei héldum við að okkur ætti eftir að finnast tíminn líða OF hratt!
Íbúðin er að verða fín en það vantar enn ýmislegt svona eins og gengur og gerist. Annars gæti ég sjálfsagt endalaust verið að breyta og betrumbæta hérna innandyra.
Helgin er búin að vera góð þrátt fyrir að betri helmingurinn hafi ekki haft hugmynd um að Konudagurinn væri í dag! Við löbbuðum upp Úlfarsfell, fórum í kaffi til tengdó og ég er búin að vera dugleg við saumavélina (ekki veitti af, þar sem ég átti ýmislegt uppsafnað). Gærdagurinn fór í rölt niður í Skeifu þar sem hin ýmsu atriði voru afgreidd. Sá snúningur endaði á Cafe Milano þar sem heimsmálin voru rædd, bæði stór og smá. Kvöldið fór í rólegheit, handavinnu og sjónvarpsgláp... ekki mikil spenna á þeim bænum.
Það er búið að vera æðislegt veður síðastliðna viku og vonandi ekkert lát á því.
Kærar kveðjur
Eydís
»
20.01.2011 21:03:28 / eydisein
Saumaklúbbur á morgun og allt að verða til. Búin að búa til eftirréttinn fræga úr Húsó og kaupa i hitt góðgætið sem verður útbúið á morgun. Annars snýst saumaklúbbur aðalega um að gera einhverja handavinnu og fá hugmyndir því tengdu en ekki hvað maður fái að éta í það og það skipti... allaveganna hjá mér!
Ég er búin að vera voðalega frjó þessa dagana og er með fullt af hugmyndum í kollinum. Kemur svo í ljós hvað maður framkvæmir af þeim. Ligg andvaka á kvöldin löngu eftir að ég leggst á koddann. Bæði gott og slæmt.
Janúar hefur hinsvegar farið heldur hægt og stirðbusalega í gang hjá mér. Vona að eitthvað fari að rætast úr því og að sama skapi að vörurnar í Ikea sem við erum að bíða eftir fari að láta sjá sig!
Bið að heilsa
Hin hugmyndaríka
»
Síður:
1 2 3 ...
10